କାର୍ଯ୍ୟକଳାପ

ପୂଜନୀୟା ଶ୍ରୀମା’ ଭାବମୟୀ ପରମହଂସଙ୍କର ଦିବ୍ୟ ଉପଦେଶଗୁଡ଼ିକୁ ଜୀବନରେ ଅନୁଭବ କରିବା ଓ ସମାଜରେ ପ୍ରଚାର କରିବା ପାଇଁ ଦିବ୍ୟଧାମ ଯୋଗାଶ୍ରମର କାର୍ଯ୍ୟକଳାପଗୁଡ଼ିକ ଏକ ପୁଣ୍ୟ ସୁଯୋଗ ପ୍ରଦାନ କରେ। ମା’ଙ୍କ କୃପାରେ, ଆଶ୍ରମର ସମସ୍ତ କାର୍ଯ୍ୟକଳାପ—ସାଧନା, ସେବା, ଆଧ୍ୟାତ୍ମିକ ଜ୍ଞାନର ପ୍ରଚାର କିମ୍ବା ସାମାଜିକ ସହାୟତା ଆଦି ସବୁ କିଛି ତାଙ୍କର ପବିତ୍ର ପାଦପଦ୍ମରୁ ନିସୃତ, ଯାହା ଜନମାନସକୁ ଉଚ୍ଚତମ ଆଦର୍ଶ ସହିତ ସମନ୍ବିତ ଭାବରେ ଚଳିବା ପାଇଁ ପ୍ରେରଣା ଦେଉଛି।

ଦୈନିକ ଆଧ୍ୟାତ୍ମିକ କାର୍ଯ୍ୟକଳାପ

ଯୋଗ, ଭାରତୀୟ ଦର୍ଶନ ଏବଂ ସଙ୍ଗୀତର ଶିକ୍ଷା ଓ ପ୍ରଶିକ୍ଷଣ

ଦିବ୍ୟଧାମ ଯୋଗାଶ୍ରମର ଯୋଗ ପ୍ରତିଷ୍ଠାନ ନାନାପ୍ରକାର ଯୋଗ, ଭାରତୀୟ ଦର୍ଶନ ଏବଂ ଭକ୍ତି ଓ ଶାସ୍ତ୍ରୀୟ ସଙ୍ଗୀତରେ ଶିକ୍ଷା ପ୍ରଦାନ କରିଥାଏ । କର୍ମଯୋଗ, ଭକ୍ତିଯୋଗ, ଜ୍ଞାନଯୋଗ ଓ ରାଜଯୋଗର ଶିକ୍ଷା ସହିତ, ଭଗବଦ୍‌ଗୀତା, ଶ୍ରୀମଦ୍‌ଭାଗବତ ଓ ଉପନିଷଦ ଆଦି ପବିତ୍ର ଶାସ୍ତ୍ରଗୁଡ଼ିକର ବ୍ୟାଖ୍ୟାନ କରାଯାଇଥାଏ । ଭାରତ ଏବଂ ବିଦେଶରୁ ଆସୁଥିବା ଛାତ୍ରମାନଙ୍କ ପାଇଁ ଉଭୟ ସ୍ୱଳ୍ପକାଳୀନ ଏବଂ ଦୀର୍ଘକାଳୀନ ଆବାସିକ ପାଠ୍ଯକ୍ରମ ଏବଂ ଯୋଗ ଶିକ୍ଷାଦାନର ଆୟୋଜନ କରାଯାଇଥାଏ।

ଆଧ୍ୟାତ୍ମିକ ମାର୍ଗଦର୍ଶନ ଓ ଶିକ୍ଷା

ଆଧ୍ୟାତ୍ମିକ ଜ୍ଞାନ ଅନ୍ବେଷୀ ସମସ୍ତ ଶିଷ୍ୟମାନଙ୍କୁ ବ୍ୟକ୍ତିଗତ ସାକ୍ଷାତ୍‌କାର କିମ୍ବା ପତ୍ର ଦ୍ୱାରା ନିର୍ଦ୍ଦେଶ କିମ୍ବା ଉପଦେଶ ଦିଆଯାଏ। ପ୍ରତ୍ୟେକ ବ୍ୟକ୍ତିର ପରିସ୍ଥିତି ଅନୁସାରେ, ଆଶ୍ରମ ସେମାନଙ୍କୁ ଏକ ଆଦର୍ଶ ଗୃହସ୍ଥର ଜୀବନ ବାସ କରିବାକୁ କିମ୍ବା ପୂର୍ଣ୍ଣକାଳୀନ ସାଧକ ଭାବେ ନିଜକୁ ସମର୍ପିତ ହେବାକୁ ପ୍ରେରଣା ଦିଏ

ସାଧୁସନ୍ଥ ସେବା

ଆଧ୍ୟାତ୍ମିକ ପ୍ରକାଶନ

ଆଧ୍ୟାତ୍ମିକ ଜ୍ଞାନର ପ୍ରସାର ପାଇଁ ପରମ୍ପରାଗତ ଉଦ୍ଦେଶ୍ୟ ଅନୁଯାୟୀ, ଦିବ୍ୟଧାମ ଯୋଗାଶ୍ରମ ଓଡ଼ିଆ, ଇଂରାଜୀ, ଜାପାନୀ, ସ୍ପାନିଶ ଓ ଫରାସୀ ଭାଷାରେ ସମୟ ସମୟରେ ପୁସ୍ତକ ଓ ପୁସ୍ତିକାମାନ ପ୍ରକାଶ କରିଥାଏ । ଏହି ପ୍ରକାଶନଗୁଡିକ ପୂଜ୍ୟ ମା’ଙ୍କର ଶିକ୍ଷା ମାଧ୍ୟମରେ ସତ୍ୟ ଅନୁସନ୍ଧିତ୍ସୁ ସାଧକମାନଙ୍କୁ ପଥ ପ୍ରଦର୍ଶନ କରିବାକୁ ଉଦ୍ଦିଷ୍ଟ ଥାଏ ।

ସାମାଜିକ କଲ୍ୟାଣକାରୀ କାର୍ଯ୍ୟକଳାପ

ଦିବ୍ୟଧାମ ଯୋଗାଶ୍ରମ ବିଭିନ୍ନ ସାମାଜିକ କଲ୍ୟାଣ କାର୍ଯ୍ୟରେ ନିୟୋଜିତ ରହି ଆସୁଅଛି । ଏକ ଦୂରସ୍ଥ ପଲ୍ଲୀ ଅଞ୍ଚଳ, ମୋଟରୀ ଠାରେ ଅବସ୍ଥିତ ଆଶ୍ରମର ଏକ ଉପକେନ୍ଦ୍ର ‘ତପୋବନ ଆଶ୍ରମ’ ଦ୍ୱାରା ଏକ ଦାତବ୍ୟସେବାମୂଳକ ଔଷଧାଳୟ ପରିଚାଳିତ ହେଉଅଛି, ଯେଉଁଠାରେ ଲୋକମାନେ ବହୁଦିନ ଧରି ଯଥାର୍ଥ ଚିକିତ୍ସା ସୁବିଧାରୁ ବଞ୍ଚିତ ଥିଲେ। ପୁରୀରେ ଅବସ୍ଥିତ ଅନ୍ୟ ଏକ ସେବାମୂଳକ ହୋମିଓପ୍ୟାଥିକ୍‌ ଔଷଧାଳୟରେ ଆବଶ୍ୟକତା ଅନୁଯାୟୀ ଲୋକମାନଙ୍କୁ ନିଶୁଳ୍କ ଚିକିତ୍ସା ଓ ଔଷଧ ପ୍ରଦାନ କରାଯାଏ। ପ୍ରତି ଶନିବାର ଓ ରବିବାର ଦିନ ଆଶ୍ରମ ପରିସରରେ ରନ୍ଧା ପ୍ରସାଦ ‘ନାରାୟଣ ସେବା’ର ପରମ୍ପରା ଭାବେ ବିତରଣ କରାଯାଏ। ନିରାଶ୍ରୟ ଅଭାବଗ୍ରସ୍ତ ଲୋକମାନଙ୍କୁ ମଧ୍ୟ ଆଶ୍ରମ ତରଫରୁ ଖାଦ୍ୟ ଓ ଅନ୍ୟାନ୍ୟ ଦାନ ଯୋଗାଇ ଦିଆଯାଏ। ଆଶ୍ରମ ଆବଶ୍ୟକତା ଅନୁସାରେ ଛାତ୍ରମାନଙ୍କୁ ଆଶ୍ରୟ, ଖାଦ୍ୟ ଓ ଛାତ୍ରବୃତ୍ତି ମଧ୍ୟ ଯୋଗାଇ ଦେଇଥାଏ । ଏହା ବ୍ୟତୀତ, ବୃଦ୍ଧ, ଅଭାବଗ୍ରସ୍ତ ମୋଟରୀ ଅଞ୍ଚଳବାସୀମାନକୁ ଆଶ୍ରମ ତରଫରୁ ସମୟ ସମୟରେ ଆର୍ଥିକ ସହାୟତା ଯୋଗାଇ ଦିଆଯାଇଥାଏ।

ଗୋ-ସେବା (ଗୋମାତା ସେବା)

ଦିବ୍ୟଧାମ ଯୋଗାଶ୍ରମ ଆଶ୍ରମ ଅଧୀନରେ ଦୁଇଟି ଗୋଶାଳା ଅଛି—ଗୋଟିଏ ପୁରୀସ୍ଥିତ ବନପ୍ରସ୍ଥ ଆଶ୍ରମରେ ଏବଂ ଅନ୍ୟଟି ମୋଟରୀସ୍ଥିତ ତପୋବନ ଆଶ୍ରମରେ। ଏହି ଗୋଶାଳାଗୁଡ଼ିକରେ ଦୁଗ୍ଧାଳୁ ଗୋମାତାମାନଙ୍କ ସହିତ ବୟସ୍କା, ବନ୍ଧ୍ୟା ଓ ଦୁଗ୍ଧଦାନ ଅକ୍ଷମମାନଙ୍କୁ ମଧ୍ୟ ସେବା ସହିତ ରଖାଯାଏ। ଗୋଶାଳାରୁ ଉତ୍ପନ୍ନ ସଦ୍ୟ ଦୁଗ୍ଧ ପ୍ରତିଦିନ ଆଶ୍ରମରେ ବ୍ୟବହୃତ ହୁଏ ଓ ଏଥିରୁ ଘିଅ ପ୍ରସ୍ତୁତ କରାଯାଇ ବିଶ୍ୱଶାନ୍ତି ଉଦ୍ଦେଶ୍ୟରେ ପ୍ରତିଦିନର ଯଜ୍ଞରେ ବ୍ୟବହୃତ ହୋଇଥାଏ।

ପର୍ବପର୍ବାଣୀ ଓ ଉତ୍ସବ

ଦିବ୍ୟଧାମ ଯୋଗାଶ୍ରମରେ ପାଳନ କରାଯାଉଥିବା ପର୍ବପର୍ବାଣୀ ମଧ୍ୟରେ ସର୍ବପ୍ରଧାନ ହେଉଛି ପୂଜ୍ୟା ମା’ଙ୍କର ଅବିର୍ଭାବ ଦିବସ ଏବଂ ଗୁରୁପୂର୍ଣ୍ଣିମା। ଭାରତ ଏବଂ ବିଦେଶରୁ ବହୁ ଶିଷ୍ୟ ଓ ଭକ୍ତମାନେ ଆସି ଏହି ସମାରୋହରେ ଯୋଗ ଦିଅନ୍ତି । ଆଶ୍ରମର ଅନ୍ୟ ଏକ ମୁଖ୍ୟ ପର୍ବ ହେଉଛି ସେପ୍ଟେମ୍ବର–ଅକ୍ଟୋବରରେ ପାଳିତ ହେଉଥିବା ଷୋଡ଼ଶ ଦିବସ ବ୍ୟାପି ଦୁର୍ଗାପୂଜା। ଏହା ସହିତ ଆଶ୍ରମରେ ପାଳନ କରାଯାଉଥିବା ଅନ୍ୟ ପର୍ବପର୍ବାଣୀମାନ ହେଲା – ଶ୍ରୀରାମ ନବମୀ, ଶ୍ରୀକୃଷ୍ଣ ଜନ୍ମାଷ୍ଟମୀ, ଦୀପାବଳୀ, ରଥଯାତ୍ରା ଓ ଖ୍ରୀଷ୍ଟମାସ ଆଦି I ଦିବ୍ୟଧାମ ଯୋଗାଶ୍ରମ ସମସ୍ତ ଧର୍ମକୁ ସମ୍ମାନ କରେ ଏବଂ ସମସ୍ତ ଧର୍ମର ମୂଳତତ୍ତ୍ୱ ଏକ ବୋଲି ବିଚାର କରେ ।

ସାଂସ୍କୃତିକ ଓ କଳାତ୍ମକ କାର୍ଯ୍ୟକଳାପ

ଆଶ୍ରମ ସାଂସ୍କୃତିକ ଓ କଳାତ୍ମକ କାର୍ଯ୍ୟକଳାପକୁ ସର୍ବଦା ପ୍ରୋତ୍ସାହନ ପ୍ରଦାନ କରେ ତଥା ପ୍ରତିଷ୍ଠିତ କଳାକାର ଓ ଛାତ୍ରମାନଙ୍କୁ ଉତ୍ସାହିତ କରିବା ଉଦ୍ଦେଶ୍ୟରେ ପର୍ବପର୍ବାଣୀ ଓ ଉତ୍ସବମାନଙ୍କ ଅବସରରେ ଆୟୋଜିତ ଭକ୍ତିସଙ୍ଗୀତ, ନୃତ୍ୟ ଓ ନାଟକର ପ୍ରସ୍ତୁତିରେ ସେମାନଙ୍କୁ ଅଂଶଗ୍ରହଣ କରିବାକୁ ପ୍ରୋତ୍ସାହିତ କରିଥାଏ I ଶ୍ରୀମା’ଙ୍କର ଆବିର୍ଭାବ ଉତ୍ସବ ଓ ଗୁରୁପୂର୍ଣ୍ଣିମା ଅବସରରେ ଆଶ୍ରମ ପରିସରରେ, ଏକ ବିଶେଷ ସାଂସ୍କୃତିକ ଓ କଳାତ୍ମକ ସଭା ଅନୁଷ୍ଠିତ ହୁଏ ଯାହା ‘ଆନନ୍ଦ ସଭା’ ଭାବରେ ନାମିତ। ଭାରତ ଏବଂ ବିଦେଶରୁ ଆସୁଥିବା ଛାତ୍ର, ଭକ୍ତ ଏବଂ ଶିଷ୍ୟମାନଙ୍କୁ ଏହି କାର୍ଯ୍ୟକ୍ରମଗୁଡ଼ିକରେ ଏବଂ ପ୍ରତିଦିନର ପ୍ରାର୍ଥନା ସଭାରେ ସକ୍ରିୟ ଅଂଶଗ୍ରହଣ କରିବାର ସୁଯୋଗ ଦିଆଯାଇଯାଏ।

ଧାର୍ମିକ ଓ ଐତିହାସିକ ସ୍ଥଳଗୁଡ଼ିକର ରକ୍ଷଣାବେକ୍ଷଣ